اهداء ديوان احتمال الوحدة تنفع - عبدالرحمن بلال 2019
اهداء ديوان (احتمال الوحدة تنفع)
 |
| ديوان احتمال الوحدة تنفع - عبدالرحمن بلال |
للناس الخايفه من الجاي
والناس المرعوبة من بكره
للناس اللي بتشرب شاي
والناس اللي بتشرب موكا
ولكل أصحابي الجدعان
ولـ بنت زميلتي في شغل قديم
لـ محمد صاحبي و هيام . .
ولـ عبدو ومحمود وسمير
ولكل قهاوي شارع فيصل
لـ صديقتي جهاد وتقي الدين
ولقهوة ميلودي ولأكتوبر
والحي الأول و أمير
و لأخويا وأختي وللعيلة !
لـ الوِحدة اللي انا عايش فيها
ولكل سيجاره بولعها
لقميص كان نفسي أكويه وكسلت !
ولكل مدينة بودعها
والضحك اللي مجاش من فتره
ولكل الناس المهمومة ازاي ها تجيب عفش الشقة
أو حتي ازاي ها تجيب شقه
ولـ غُربة اتمنيت أسافرها
ولناس اتمنيت أقابلها
ولبنت إدتني ميعاد ومجاتش !
فـ دعيت أقابلها ولو صدفه.
ولـ صاحب عُمر خَذلني في يوم
ولصاحب عُمر خَذلته في يوم
للفيلم اللي انا شوفته امبارح
ومش فاكره لأن غلبني النوم
ولعشاق الليل والقهوة
لقصايد رافض أنشرها
ولـ ضعفي وخوفي وتقصيري
اهداء
لـ الأوضة المقفولة
ولـ ريحة دخان مكتومه
للهاند فري ولـ ريم بنا
ولشله وجودي بيفْرحها
ولشله بتفرح من غيري
ولكل قصائد درويش
اهداء
للعايش كـ الميت
ولـ ميت كان نفسه يعيش .
تعليقات
إرسال تعليق