إقفل الدايرة - عبدالرحمن بلال 2019
قصيدة اقفل الدايرة - ديوان احتمال الوحدة تنفع 2019
 |
| قصيدة اقفل الدايرة من ديوان احتمال الوحدة تنفع 2019 - عبدالرحمن بلال |
لمّ اللي فاكره من تجاربك
واللي فاضل من صحابك
والتيشرت النص كم إياه . .
وغيب !
اقفل الدايرة ببرود
وإن يسألوك إيه غيرك ؟
قول النصيب .
مهما تحكي مش ها تسمع غير هاتُفرج
لو غرقت مش ها تلقي إيد تساعدك
فـ انت حاول تلحقك ,
واعرف إن الصحبة وقت ,
واعرف ان الطيبة ذنب ,
واعرف ان الجاي أصعب . .
وان اللي قابلك ع الطريق ,
بكره يفوّتك ع الطريق .
هوّن عليك
لا انت أول حد يزعل
ولا حتي ده أخر زعل !
لسه ها تشوف مـ الزمن ,
حجات يّجوز لا تُحتمل !
لما ها تفكر في بكره وتِترعب
وتبص حواليك متلاقيش غير الوجع . .
وتخاف ترد علي اتصالها لَيتعبك !!
اعرف إن ساعتها بس ,
إن حُزنك اكتمل .
فاضحك بقي ,
منتاش لوحدك في الحياه اللي إتظلم . .
كل اللي وجعك إتوجع . .
فأنت حاول تلحقك ,
لم التفاصيل البسيطة وكل حاجه بتسعدك . .
واقفل الدايرة بهدوء
وإن يسألوك إيه غيرك ؟
قول ده الطبيعي !
خبي ضَعفك عن عنيهم ,
وابّكي نص الليل براحتك .
وخش رد علي الرسايل اللي وصلت من يومين ,
مش مُهم صاحبها مين !
واللي باعت : عامل ايه ؟
قوله عامل شاي وبضحك.
واللي باعت : هو انتو فعلاً سِبتوا بعض ؟
قوله أيوه . . ده الطبيعي
كان طبيعي تّخاف تكمل ,
حد زيي لا يُحتمل . .
هي بنت أصول وياما إتحّملت ,
هي غابت , بس عادي
هي حاضره , مهما غابت .
بس ماتردش عليها ,
مهما بّاعتت .
واقفل الدايرة بأدب
وإن يسألوك إيه غيرك ؟
قول العشم .
وخّبي تفاصيل الفراق ,
وخّبي برضو الاشتياق .
واتفادي تسمع اسمها فـ تحن عكس الاتفاق !
واقفل الدايرة بـ دموع
واوعي تنسي مين اللي قتلك . .
واعترف , بعد ما تخلص بُكي
إن كل ده بسببك !
وبإن يمكن لو كُنت قافل دايرتك يا جَميل!
كان يجوز ,
كل ده , ماكنش يحصل .
عبدالرحمن بلال
ديوان احتمال الوحدة تنفع
يناير 2019
تعليقات
إرسال تعليق